ഒഴുകിയിറങ്ങുകയാണ്
നിന്റെ നനുത്ത സ്നേഹം.
എന്റെ വിരലുകളിലൂടെ,
എന്റെ മിഴികളിലൂടെ,
എവിടേയ്ക്കെന്നറിയാതെ.
എനിക്കു ചുറ്റുമിന്ന്
ആകാശമോ ഭൂമിയോ
കറുപ്പോ വെളുപ്പോ
സ്വർഗ്ഗമോ നരകമോ ഇല്ല;
നിന്റെ സ്വപ്നങ്ങളുടെ തണുപ്പു മാത്രം.
നിഴലുകൾക്കിടയിലേയ്ക്ക്
ഓടിമറയുന്നതിനു മുൻപ്
നീയെനിക്കു തന്ന
വാടാത്ത പൂക്കളുടെ ഓർമ്മയ്ക്ക്
ഞാനിത്തിരി
നിലാവു നിനക്കു തന്നുകൊള്ളട്ടേ?
കാലം കവർന്നെടുത്തവയ്ക്കു പകരം
സ്നേഹം നീട്ടുന്ന കുഞ്ഞു വെളിച്ചം.
